Breaking News
Home / اہم خبریں / جاوید چوہدری کی تہلکہ خیز تحریر

جاوید چوہدری کی تہلکہ خیز تحریر

لاہور (ویب ڈیسک) نامور کالم نگار جاوید چوہدری اپنے ایک کالم میں لکھتے ہیں ۔۔۔۔۔۔نعیم قمر میرے پرانے دوست ہیں‘ اسلام آباد میں رہتے ہیں‘ گھر بناتے ہیں اور کمال کر دیتے ہیں‘ میں نے آج تک کسی پاکستانی میں نعیم قمر سے زیادہ حس جمال (Aesthetic) نہیں دیکھی‘ گارے‘ سیمنٹ‘ لکڑی اور لوہے میں جان ڈال دیتے ہیں‘

چالیس پچاس کروڑ روپے کا گھر بناتے ہیں لیکن یہ اسٹارٹ ہونے سے پہلے ہی بک جاتا ہے‘ سمجھ دار بھی ہیں‘ زندگی گزارنے کا سلیقہ بھی جانتے ہیں اور زیادہ تر ایشوز پر اپنی جینوئن رائے بھی رکھتے ہیں‘ یہ غیر سیاسی ہیں۔سیاست پر عموماً بات نہیں کرتے لیکن کل ان سے ملاقات ہوئی تو نعیم صاحب نے دو ایسی سیاسی باتیں کیں جن پر میں دیر تک واہ واہ بھی کرتا رہا اور یہ سطریں بھی لکھنے پر مجبور ہو گیا‘ کہنے لگے ۔ فوج ملک کا واحد انتہائی ڈسپلنڈ ادارہ ہے‘ اس میں بھی کسی غریب شخص کا بیٹا آرمی چیف بن سکتا ہے اور نیچے سے اوپر پہنچنے تک اسے کوئی نہیں روک سکے گا‘ آپ جنرل ٹکا خان سے لے کر جنرل قمر جاوید باجوہ تک تمام آرمی چیفس کا بیک گراؤنڈ دیکھ لیں یہ سب عام گھروں سے تعلق رکھتے تھے اور ترقی کر کے اوپر تک پہنچے‘ آپ اس کے علاوہ ملک کا کوئی ادارہ بتایے جس میں کوئی شخص داخل ہو اور اسے یہ یقین ہو وہ اس ادارے کا سربراہ بن سکتا ہے۔آپ کو کوئی ادارہ نہیں ملے گا لہٰذا آپ خود بتایے کیا ایسا نہیں‘‘ میں ہنس پڑا‘ ان کی دوسری بات اس سے بھی زیادہ دل چسپ تھی‘ ان کا کہنا تھا’’میاں نواز شریف اگر 2017 میں اپنی پارٹی میاں شہباز شریف کے حوالے کر دیتے تو آج ملک اور ن لیگ دونوں کی صورت حال مختلف ہوتی‘ شہباز شریف تمام اسٹیک ہولڈرز سے بات چیت کر کے معاملات بھی سیٹل کر چکے ہوتے

اور ملک بھی آج کہیں سے کہیں پہنچ گیا ہوتا‘‘۔میں نے ان سے مکمل اتفاق کیا‘ نواز شریف نے مئی 2016 میں دل کے آپریشن سے پہلے پارٹی اور وزارت عظمیٰ دونوں میاں شہباز شریف کے حوالے کرنے کا فیصلہ کر لیا تھا لیکن میاں شہباز شریف نہیں مانے تھے‘ 31مئی کو دونوں بھائی دوبارہ کمرے میں اکیلے بیٹھے اور فیصلہ ہو گیا میاں نواز شریف سیاست سے ریٹائرمنٹ کا اعلان کریں گے اور شہباز شریف ٹیک اوور کر لیں گے‘ عرفان صدیقی کو تقریر تیار کرنے کے لیے بلایاگیا‘ صدیقی صاحب اسپتال کے کمرے میں بڑے میاں صاحب کے ساتھ اکیلے بیٹھے اور فیصلہ واپس ہو گیا۔اپریل 2017 میں پاناما کے فیصلے کے بعد بھی یہ موقع آیا تھا‘ یہ اگر سیاست سے ریٹائر ہو جاتے اور پارٹی میاں شہباز شریف کے حوالے کر دیتے تو ن لیگ 2018 کا الیکشن بھی جیت جاتی اور پارٹی بھی بچ جاتی لیکن میاں نواز شریف ایجی ٹیشن کی طرف نکل گئے اور اس کا وہی نتیجہ نکلا جو نکلنا تھا‘ ہمیں یہ حقیقت بھی ماننا ہوگی پاکستان مسلم لیگ ن میں دو بیانیے ہیں‘ پہلا بیانیہ ’’ووٹ کو عزت دو‘‘ اور دوسرا ’’مل کر چلیں‘‘ ہے‘ میاں شہباز شریف شروع سے مل کر چلنے کے قائل ہیں لیکن یہ اس بیانیے کے ساتھ ساتھ اپنے بھائی کو دھوکا دینے کے لیے بھی تیار نہیں ہیں۔یہ اس وفاداری کا مسلسل تاوان ادا کر رہے ہیں‘ میاں نواز شریف کے پاس تیسرا موقع 19نومبر2019 کو لندن جانے کے بعد آیا تھا‘ یہ کام بھی میاں شہباز شریف نے کیا تھا‘

مذاکرات بھی انھوں نے کیے تھے اور میاں صاحب کے ضامن بھی یہ تھے‘ میاں صاحب کے بعد مریم نواز بھی ملک سے باہر جا رہی تھیں لیکن عمران خان مریم نواز کے معاملے میں ڈٹ گئے اور یہاں سے نئی کہانی شروع ہو گئی‘ حکومت اگر مریم نواز کو بھی جانے دیتی تو بڑے میاں صاحب کا خاندان خاموشی اختیار کر لیتا اور آج حالات مختلف ہوتے لہٰذا ہم یہ کہہ سکتے ہیں یہ موقع حکومت نے ضایع کر دیا۔حکومت نے یہ کیوں کیا؟ اس کی وجہ خوف تھا‘ حکومت کا خیال تھا مریم نواز کے بعد میاں شہباز شریف کا راستہ کھل جائے گا‘یہ اسٹیبلشمنٹ کے ساتھ مذاکرات کریں گے اور کم از کم پنجاب ضرور واپس لے لیں گے چناں چہ حکومت نے جان بوجھ کر مریم نواز کو ملک میں رکھا اور میاں نواز شریف کو مجبور کر دیا یہ ’’ووٹ کو عزت دیں‘‘ کے ساتھ دوبارہ میدان میں آ جائیں‘ حکومت نے میاں شہباز شریف کا راستہ روکنے کے لیے مریم نواز کو ہیرو بننے کا پورا موقع بھی دیا‘ ملک میں ان کے انٹرویوز بھی چل رہے ہیں اور تقریریں بھی لائیو دکھائی جا رہی ہیں۔کیوں؟ کیوں کہ یہ ہیرو بنیں گی تو میاں شہباز شریف کا راستہ رکے گا اور عمران خان یہ کارڈ شان دار طریقے سے کھیل رہے ہیں‘ ہمیں یہ بھی ماننا ہو گا ن لیگ سیاسی لحاظ سے مار کھا رہی ہے‘ پی ڈی ایم کی تحریک کا فائدہ پاکستان پیپلز پارٹی اٹھا رہی ہے‘ یہ حکومت اور اسٹیبلشمنٹ دونوں

کے ساتھ انگیج ہو چکی ہے اور سینیٹ کے الیکشنز میں بھی شریک ہو گی اور استعفے بھی نہیں دے گی لہٰذا ہم کہہ سکتے ہیں ن لیگ سیاسی لحاظ سے پھنس گئی ہے‘اب سوال یہ ہے پارٹی کو اس صورت حال سے کون نکال سکتا ہے؟ وہ شخص میاں شہباز شریف ہے‘ محمد علی درانی کی شکل میں ایک نیا پتا سامنے آیا ہے۔پیر صاحب پگاڑا کی سیاست کا محور کون ہے؟ محمد علی درانی کون ہیں اور یہ کس کے بندے ہیں؟ یہ کوئی ڈھکی چھپی بات نہیں‘ قید خانے میں میاں شہباز شریف کی فیملی کو بھی ملاقات کی اجازت نہیں ملتی جب کہ محمد علی درانی مرسڈیز میں قید خانے گئے اور سیدھا میاں شہباز شریف تک پہنچ گئے‘ کیسے؟ وجوہات پوری دنیا جانتی ہے تاہم یہ موو اچھی ہے‘ لندن میں شریف فیملی کے ایک فرد کے ساتھ مذاکرات چل رہے ہیں اور یہ بریک تھرو ان مذاکرات کا نتیجہ ہے‘ میاں نواز شریف بھی اب مذاکرات کے لیے تیار ہیں بس ان کے دو مطالبات ہیں‘ اسٹیبلشمنٹ لیول پلے انگ فیلڈ دے دے‘ حکومت اور اپوزیشن دونوں کو سیاست کا موقع دے دیاجائے‘ یہ اپنا فیصلہ خود کر لیں‘ ریاست نیوٹرل رہے اور دوسرااگر سیاسی جماعتیں الیکشن پر راضی ہو جاتی ہیں تو اگلا الیکشن غیر جانب دار ہو اورکوئی اس میں مداخلت نہ کرے۔میرے ناقص علم‘ تجربے اور تجزیے کے مطابق ملک بری طرح سیاسی گرداب میں پھنس گیا ہے‘ ہم معاشی‘ سماجی اور سفارتی تینوں محاذوں پر پٹ رہے ہیں اور ملک کو اب اس گرداب

سے نکالنے کا صرف ایک ہی طریقہ ہے‘ گرینڈ ڈائیلاگ اور پیر صاحب پگاڑا نے یہ ذمے داری اٹھا لی ہے‘ یہ حکومت اور اپوزیشن دونوں کو اکٹھا بٹھانے کے لیے تیار ہیں‘یہ کوشش اگر کام یاب ہو گئی تو میاں شہباز شریف باہر آئیں گے اور یہ اس بار مکمل مختلف انسان ہوں گے‘ یہ کھل کر سیاسی ڈائیلاگ اور میثاق معیشت کا اعلان کریں گے۔یہ حکومت کی طرف بھی ہاتھ بڑھائیں گے اور حکومت نے اگر یہ ہاتھ تھام لیا اور فریقین کسی سمجھوتے پر پہنچ گئے تو ملک ٹریک پر واپس آ جائے گا لیکن اگر عمران خان نے یہ ہاتھ جھٹک دیا تو پھر یہ اکیلے رہ جائیں گے‘ ان کی تمام سپورٹیں نکل جائیں گی جس کے بعد ان کا حکومت میں رہنا مشکل ہو جائے گا اور دوسرا اگر میاں نواز شریف نہ مانے‘ انھوں نے اگر میاں شہباز شریف کو گرینڈ ڈائیلاگ کی اجازت نہ دی تو پھر میاں شہباز شریف سیاست چھوڑ دیں گے‘ یہ ریٹائرمنٹ لے لیں گے اور باقی زندگی چپ چاپ گزار دیں گے‘ مریم نواز پارٹی چلائیں گی۔میں یہاں یہ بھی عرض کرتا چلوں ہمیں میاں شہباز شریف ماڈل پر جانا ہو گا اور وہ ماڈل یہ ہے دروازے کھولیں‘ ڈائیلاگ کریں اور ملک کے تمام ایشوز مستقل طور پر حل کر دیں‘ ہم اگر اس ماڈل پر چلے جاتے ہیں تو ہم بڑے نقصان سے بچ جائیں گے اور ہم اگر آج یہ نہیں کرتے تو پھر ہمیں بڑے نقصان کے بعد بھی اسی ماڈل پر آنا پڑے گا‘ ہمیں بہرحال ڈائیلاگ کرنا پڑے گا۔

Share

About admin

Check Also

چینی کی قیمت میں بڑی کمی۔۔ فی کلو ریٹ 42روپے تک گر گئے،پاکستانی خوشی سے نہال

چینی کی قیمت میں بڑی کمی۔۔ فی کلو ریٹ 42روپے تک گر گئے،پاکستانی خوشی سے …

Leave a Reply

Your email address will not be published. Required fields are marked *

Powered by themekiller.com